Azərbaycan, Bakı, 6 mart /Trend, müxbir H.Vəliyev/
Təcili tibbi yardım avtomobilləri elektron sağlamlıq kartlarından məlumatları oxumaq üçün mobil qurğularla təchiz ediləcək. Bu barədə çərşənbə axşamı Trend-ə Azərbaycan Səhiyyə Nazirliyinin İctimai Səhiyyə və İslahatlar Mərkəzinin direktor müavini Cəbrayıl Əsədzadə bildirib.
Əsədzadənin sözlərinə görə, layihənin həyata keçirilməsi cari ilə nəzərdə tutulub.
Plana əsasən, layihə çərçivəsində mobil qurğuların inteqrasiyasını və onların mərkəzi məlumat bazası ilə avtomatik işini təmin edən proqram modulunun hazırlanması planlaşdırılır.
Tibbi uçotun tətbiqi prosesinin avtomatlaşdırılması zəruri informasiyanın axtarışını asanlaşdırır və diaqnoz qoyma vaxtını qısaldır.
"Layihənin tez həyata keçirilməsi avadanlıqların tədarük müddətindən asılıdır. İlkin mərhələdə bütün məlumatın qurğularda saxlanması nəzərdə tutulur, perspektivdə isə lokal şəbəkə üzrə birbaşa mərkəzi bazaya qoşulma imkanı var", - Əsədzadə qeyd edib.
Azərbaycan Səhiyyə Nazirliyi 500 min elektron sağlamlıq kartı verib. Elektron sağlamlıq kartları İctimai Səhiyyə və İslahatlar Mərkəzində hazırlanır və poliklinikalar vasitəsilə yeni doğulmuş körpələrin valideynlərinə və pasiyentlərə təqdim edilir.
Kartlarda sahibinin şəxsiyyəti, tibbi və sosial sığorta və s. haqqında məlumat yer alır. İnformasiya tibb müəsisəsinin xidməti məlumatlarının operativ mübadiləsinə imkan verən vahid məlumat bazasında yerləşdirilir.
Bu günədək idarənin tabeçiliyində olan bütün doğum evləri, xəstəxanaların doğum şöbələri və uşaq tibb müəssisələri bu sistemə qoşulub.
Layihə "Elektron Azərbaycan" dövlət proqramı çərçivəsində həyata keçirilir.