Azərbaycan, Bakı, 15 mart /Trend, müxbir H.Vəliyev/
Azərbaycanın "UniMark" kontent provayderi "Android" əməliyyat sisteminin idarəsi altında işləyən smartfon və planşet kompüterləri üçün "Baku Mobile Info" pulsuz elektron soraq kitabçasını hazırlayıb. Bu barədə cümə axşamı Trend-ə şirkətdən məlumat veriblər.
Sistem, həmçinin "BlackBerry OS" əməliyyat sistemini dəstəkləyir və yaxın vaxtlarda "iPhone OS" sistemini dəstəkləyən variantı təqdim etmək planlaşdırılır.
Əlavənin tərkibinə Bakı şəhərinin muzey, hotel və banklarının siyahısı daxildir. Burada onlar haqqında ətraflı məlumat və xəritədə yerləşdikləri ərazilərin göstərilməsi də öz əksini tapıb.
Elektron soraq kitabçasına "Nəqliyyat" funksiyası da daxil edilib. Burada metropoliten və taksi xidmətləri üzrə məlumat, qısa nömrələrin siyahısı, şəhər kodları və s. məlumatın daxil olduğu "Soraq kitabçası", "Təcili çağırış" (təcili tibbi yardım, polis və yanğınsöndürmə xidmətinin telefon nömrələri) və "Valyuta konverteri" yer alıb.
Əlavədə "Most See" servisi təqdim edilib. Servisə turistlərin baş çəkə biləcəyi Bakı şəhərinin bütün görməli yerlərinin siyahısı daxil edilib.
İstehlakçıların tələbatına uyğun olaraq, əlavənin funksionallığı artırılacaq. Əlavədən https://play.google.com/store/apps/details?id=az.unimark.mobileinfo.android ünvanında istifadə etmək olar.