Azərbaycan, Bakı, 4 iyun /Trend, müxbir H.Vəliyev/
"B&BTV Communications" kabel televiziya operatoru və "Azerfon" MMC mobil rabitə operatoru mobil televiziya xidmətinin göstərilməsi məqsədilə müqavilə bağlayıblar. Bu barədə bazar ertəsi Trend-ə "B&BTV Communications" şirkətinin marketinq şöbəsinin meneceri Samir Mahmudov bildirib.
Mahmudovun sözlərinə görə, əldə edilən razılığa əsasən, "B&BTV Communications" şirkəti mobil operatora təqribən 30 TV kanaldan ibarət televiziya kontenti təqdim edib.
"Mobil TV xidmətinin kommersiya istismarında işə salınması operatorun özündən asılıdır. Operator öz şəbəkəsində yayımlanacaq kanalların sayını seçəcək", - Mahmudov qeyd edib.
Mobil şəbəkə vasitəsilə yayınlanacaq televiziya kanalları əsasən kommersiya kanallarıdır.
Mobil TV-nin kommersiya istismarında işə salınmasının əsas aspekti tariflər üzrə konsensusun əldə edilməsidir.
