Azərbaycan, Bakı, 19 noyabr /Trend, müxbir H.Vəliyev/
"Ookla" şirkətinin "NetIndex" reytinqinə əsasən, Azərbaycanda daxil olan trafikin orta sürəti 3,66 Mbit/saniyə təşkil edir. Trend-in məlumatına görə, bu barədə bazar ertəsi şirkətin yaydığı məlumatda deyilir.
Bakı üzrə bu göstərici 3,62 Mbit/s, Sumqayıt üzrə isə 2,79 Mbit/s təşkil edir.
Nəticələr şirkətin oktyabrın 19-dan noyabrın 17-dək apardığı eksperimental araşdırmaların əsasında əldə edilib. Testlərin aparılması üçün 302 850 unikal IP ünvanı seçilib.
Azərbaycan daxil olan trafik reytinqi üzrə 113-ci yeri tutub. Reytinqdə Azərbaycanın 20 internet servis provayderi və rabitə operatorlarının statistik göstəricilərinin nəticələri yer alıb. Araşdırmaların aparıldığı dövrdə sadalanan rabitə qurumlarının şəbəkələrində daxil olan trafikin maksimum sürəti 6,16 Mbit/s ("Azercell Telekom" şəbəkəsində), minimum isə 2,41 Mbit/s ("TransEuroCom") təşkil edib.
Xaric olan trafik üzrə reytinqdə Azərbaycan 121-ci yeri tutub. Burada istifadəçilər şəbəkəyə 1,32 Mbit/s sürətlə çıxırlar. Bakı üzrə bu göstərici 1,23 Mbit/s, Sumqayıt üzrə isə 0,68 Mbit/s təşkil edir.
Xaric olan trafik üzrə reytinqdə Azərbaycanın 20 internet-servis-provayderi və rabitə operatorlarının statistik göstəricilərinin nəticələri də yer alıb. Araşdırmaların aparıldığı dövrdə sadalanan rabitə qurumlarının şəbəkələrində xaric olan trafikin maksimum sürəti 3,17 Mbit/s ("AG Telecom" şəbəkəsi), minimum isə 0,45 Mbit/s ("Azerbaijan Data Network" şəbəkəsi) olub.
