Azərbaycan, Bakı, 22 iyun /Trend, müxbir H. Vəliyev/
"Windows XP" platformu Azərbaycanın əməliyyat sistemləri bazarını tədricən tərk edir. Trend-in məlumatına görə, bu barədə şənbə günü "Global Stats" statistika mərkəzinin yaydığı məlumatda deyilir.
Məlumata görə, "Windows XP" bazarının payı ilin əvvəlindən 18,8 faiz azalıb, ötən ilin müvafiq göstəricisinə nisbətən isə azalma 40,7 faiz təşkil edib.
Azərbaycanın əməliyyat sistemləri bazarının 24,7 faizi "Windows XP" əməliyyat sisteminə məxsusdur.
İlin əvvəlindən Azərbaycanda "Microsoft Windows 7" əməliyyat sistemi bazarının payı 3,1 faiz artıb.
Azərbaycanda ən populyar əməliyyat sistemi "Windows 7"dir və bazarın 66 faizindən çoxu "Windows 7"ə məxsusdur. 2012-ci ilin müvafiq dövrü ilə müqayisədə "Windows 7" bazarının payı 20,3 faiz artıb.
"Global Stats"ın məlumatına əsasən, ilin əvvəlindən "Windows 8" bazarının payı iki dəfədən çox artaraq 3,62 faiz səviyyəsinə çatıb.
Ötən dövr ərzində iOS installyasiyalarının sayı üzrə 43,5 faiz artım qeydə alınıb. iOS installyasiyalarının Azərbaycanın əməliyyat sistemləri bazarındakı payı 2 faizdir.
Azərbaycanın əməliyyat sistemləri bazarının 1,25 faizini tutan "Android" bazarının payında 131,4 faiz artım qeydə alınıb ki, bu da ötən ilin göstəricisindən 7 dəfə artıqdır.
Sonrakı yerləri isə "Windows Vista" əməliyyat sistemi (0,54 faiz) və" MacOSX" (0,95 faiz) tuturlar.