Azərbaycan, Bakı, 26 noyabr /Trend, müxbir H.Vəliyev/
Azərbaycanla Fransa informasiya-kommunikasiya texnologiyaları və kosmik rabitə sahələrində əməkdaşlıq haqqında razılığa gəliblər.
Trend-in məlumatına görə, bu barədə noyabrın 26-da Bakıda imzalanmış Azərbaycan-Fransa hökumətlərarası iqtisadi komissiyanın VII iclasının protokolunda deyilir.
Tərəflər aşağıorbitli peyklərin tikintisi sahəsində əməkdaşlığa hazır olduqlarını ifadə ediblər.
Protokolda qeyd edilir ki, qəbul edilən qərar iki ölkənin strateji əməkdaşlığı üçün baza olacaq və Fransa tərəfinin Azərbaycanın II telekommunikasiya peykinin buraxılması layihəsində iştirakı bu sahədə əməkdaşlığın möhkəmləndirilməsinə xidmət edir.
Bundan başqa, tərəflər yaxın vaxtlarda bu sahədə informasiya mübadiləsi üzrə hökumətlərarası saziş imzalamaq niyyətində olduqlarını bildiriblər.
Protokolda, həmçinin nanotexnologiyalar sahəsində, TASIM layihəsində, texnoparkların yaradılması sahəsində, rəqəmsal televiziya şəbəkəsinin qurulmasında və s.-də əməkdaşlığa hazırlıq qeyd edilir.
Digər tərəfdən, tərəflər qarşılıqlı fəaliyyətin möhkəmləndirilməsi məqsədilə innovasiyalar və informasiya texnologiyaları sahələrində Azərbaycan-Fransa əməkdaşlığı haqqında saziş layihəsinin bütün aspektlərinin razılaşdırılması üzrə razılığa gəliblər.
Sənədin Azərbaycan Rabitə və İnformasiya Texnologiyaları Nazirliyi ilə Fransanın Kiçik və Orta Sahibkarlıq, İnnovasiyalar və Rəqəmsal İqtisadiyyat Nazirliyi arasında imzalanacağı gözlənilir.