Azərbaycan, Bakı, 17 fevral /Trend, müxbir H.Vəliyev/
Rabitə və İnformasiya Texnologiyaları Nazirliyinin "Teleradio" İstehsalat Birliyi (İB) ölkə əhalisinin rəqəmsal televiziya dekoderləri ilə təmin edilməsi sahəsində araşdırmalara başlayıb. Bunu bazar ertəsi Trend-ə İB-dən deyiblər.
Bu məsələnin müvafiq təhlilini aparmaq üçün Bakı və rayonların yerli icra hakimiyyəti orqanlarına müraciətlər göndərilib. Rayonların təqribən 95 faizi artıq İB-yə öz göstəricilərini təqdim ediblər. Yekun məlumat əldə olunmuş bütün nəticələr qiymətləndirildikdən sonra açıqlanacaq.
Əhalinin güzəştli kateqoriyasına rəqəmsal televiziya dekoderlərinin pulsuz çatdırılması ilə "Azərpoçt" MMC məşğul olacaq. Söhbət ünvanlı yardım alan 132 min aztəminatlı ailədən gedir. Dekoderlərin istehsalı üçün təxminən 5,4 milyon manat vəsait tələb olunur.
Hazırda respublikanın yaşayış məntəqələrinin rəqəmsal televiziya siqnalı ilə əhatə olunması radiusu 98 faizə çatır. İlin sonunadək tam olaraq rəqəmsal yayım standartına keçilməsi planlaşdırılır.