Azərbaycan, Bakı, 29 aprel /Trend, müxbir H.Vəliyev/
Rabitə və Yüksək Texnologiyalar Nazirliyinin "Teleradio" İstehsalat Birliyi (İB) ölkənin 15 yaşayış məntəqəsində rəqəmsal televiziya siqnalötürücü aparatlarının quraşdırılmasına başlayıb. Bunu Trend-ə Birlikdən deyiblər.
İB-dən bildiriblər ki, avadanlıq qismən alınıb və hazırda onun quraşdırılması üzrə işlər aparılır: "Söhbət yaşayış məntəqələrindən, əsasən rəqəmsal siqnalla əhatə olunmuş kəndlərdən gedir. Yeni ötürücü aparatlar Xızı, Şamaxı, Siyəzən, Quba, İsmayıllı, Qax, Cəlilabad, Yardımlı, Astara, Göygol, Gədəbəy, Qazax, Tovuz və Daşkəsən rayonlarında quraşdırılacaq".
Qeyd edək ki, respublika ərazisində işə salınmış rəqəmsal televiziya siqnalötürücü aparatlarının ümumi sayı 87 ədəddir. Respublika əhalisinin təqribən 98 faizi rəqəmsal siqnalla əhatə olunub.
İB-nin planlarına əsasən, rəqəmsal yayım standartına tam keçid ilin sonunadək gözlənilir.
