Azərbaycan, Bakı, 16 oktyabr /Trend, müxbir Hüseyn Vəliyev/
Azərbaycanda hər rübün ilk ayının birinci həftəsində mütəmadi olaraq "Təhlükəsiz iş həftəsi" kampaniyası keçiriləcək. Trend-in məlumatına görə, bunu Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin (DƏMX) rəisi Fuad Əlizadə mətbuat konfransında deyib.
Onun sözlərinə əsasən, sentyabrın 15-21-də keçirilmiş ilk belə aksiya çərçivəsində DƏMX-nin və digər strukturların əməkdaşları Bakı və Sumqayıtın tikinti və sənaye obyektlərində monitorinqlər keçiriblər: "Monitorinqlər işçilərin həyat və sağlamlıqla bağlı real təhlükə ilə üzləşdiyi müəssisələrdə aparılıb. Aparılmış monitorinqlər nəticəsində 12 müəssisənin (əsasən yerli) fəaliyyəti müvəqqəti dayandırılıb. Həmin müəssisələrdə bütün təhlükəsizlik tədbirlərinə riayət edildikdən sonra onların fəaliyyəti bərpa olunacaq"
F.Əlizadə qeyd edib ki, aparılmış monitorinqlərin yekunları üzrə İnzibati Xətalar Məcəlləsinin 54-cü maddəsinə uyğun olaraq müəssisələr 17,5 min manat cərimələnib.
DƏMX-nin rəisi əlavə edib ki, kampaniya mütəmadi olaraq hər rübün ilk ayının birinci həftəsində aparılacaq: "İşçilərin texniki təhlükəsizliyinin təmin edilməsi ilə yanaşı, müəssisələr işçilərin əmək müqavilələrinin elektron sistemdə qeydiyyatdan keçib-keçməməsinə görə də yoxlanılacaq".
O vurğulayıb ki, elektron sistemdə əmək müqavilələrini qeydiyyatdan keçirməyən sahibkarlar İnzibati Xətalar Məcəlləsinin 53.1-ci maddəsinə uyğun olaraq cərimələnəcəklər: "Əgər işəgötürən elektron sistemdə əmək müqaviləsini qeydiyyatdan keçirmədən doqquzdan çox işçini əmək fəaliyyətinə cəlb edərsə, bu, cinayət tərkibi əlaməti hesab olunacaq".
