Azərbaycan, Bakı, 7 noyabr /Trend, müxbir Hüseyn Vəliyev/
Azərbaycanın Rabitə və Yüksək Texnologiyalar Nazirliyinə Yüksək Texnologiyalar Parkının tikiləcəyi torpaq sahəsinin ayrılması üçün akt, həmçinin onun inşaat pasportu verilib. Bu barədə Trend-ə nazirlikdən məlumat verilib.
Yüksək Texnologiyalar Parkının tikintisi üçün Bakı şəhərinin Pirallahı rayonunda 50 hektarlıq torpaq sahəsi ayrılıb.
Nazirliyin məlumatına görə, hazırda parkın infrastrukturunun yaradılması üçün lazımi satınalmalar aparılır. Yüksək Texnologiyalar Parkının planlaşdırılması üzərində texniki nəzarət Amerikanın "Hill International" şirkəti tərəfindən həyata keçirilir.
Şirkətin planlaşdırma prosesinə texniki nəzarət üzrə sənədləri hazırlamasından sonra arxitektur və inşaat işlərinin yerinə yetirilməsi üzrə podratçının cəlb edilməsi üçün tender elan ediləcək.
Topoqrafik işlərin görülməsi üçün "Integris" şirkəti cəlb edilib. Şirkət arxitektura işlərinin relyefə uyğun aparılması üçün layihə hazırlayıb və orada obyektlərin yerləşəcəyi yerlər dəqiq göstərilib.
Parkın ərazisində inzibati və yaşayış binaları tikiləcək, inkubasiya mərkəzi, yüksək texnologiyalı məhsulların istehsalı üzrə mini zavodlar və s. yaradılacaq.