Azərbaycan Orta Asiyanın bir sıra ölkələri ilə MTF/STEFI sistemi üzrə ikitərəfli poçt pul köçürmələri tətbiq etməyi planlaşdırır. Rabitə və İnformasiya Texnologiyaları Nazirliyinin poçt rabitə şöbəsinin rəhbəri Novruz Məmmədovun Trend ə verdiyi məlumata görə, bu sistem üzrə poçt pul köçürmələrinə əvvəlcə Özbəkistan və Tacikistanla başlamaq planlaşdırılır.
Onun sözlərinə görə, artıq bu ölkələrlə razılıq əldə olunub. Azərbaycan texniki cəhətdən belə xidmətlər göstərməyə hazırdır. "Bu ölkələrdə hələlik MTF/STEFI sistemləri tətbiq olunmayıb, ancaq bu istiqamətdə işlər aparılır", - deyə nazirliyin nümayəndəsi vurğulayıb.
Azərbaycan Rusiya, Moldova, Belarus, Ukrayna, Qazaxıstan və bu ilin mayından BƏƏ ilə MTF/STEFI sistemi üzrə pul köçürmələri həyata keçirir.