Azərbaycan poçt rabitəsi sahəsində Tacikistana yardım etməyə hazırdır. Rabitə və İnformasiya Texnologiyaları Nazirliyindən Trend ə verilən xəbərə görə, Orta Asiyanın bir sıra ölkələri, o cümlədən, Özbəkistan, Tacikistan və Qırğızıstanda MTF/STEFİ sistemi üzrə poçt vasitəsilə ikitərəfli pul köçürmələrinin tətbiq edilməsi nəzərdə tutulub. Lakin sistemin tətbiqi üçün texniki təminat olmadığından, Tacikistanın poçt administrasiyası dəstək üçün Azərbaycana müraciət edib.
Rabitə və İnformasiya Texnologiyaları Nazirliyindən bildiriblər ki, onlar artıq bir sıra təklifləri hazırlayıb və Azərbaycan mütəxəssislərinin Tacikistana səfəri nəzərdə tutulub.
"Azərbaycan texniki cəhətdən STEFİ xidmətlərinin həyata keçirilməsinə hazırdır", - deyə nazirlikdən qeyd ediblər.
Hazırda Azərbaycan MTF/STEFİ sistemi üzrə Rusiya, Moldova, Belorusiya, Ukrayna, Qazaxıstan və Birləşmiş Ərəb Əmirlikləri ilə pul köçürmələrini həyata keçirir. Gələcəkdə Fransa, Yaponiya, Estoniya və digər ölkələrlə də analoji xidmətlərin həyata keçirilməsi planlaşdırılır.
