Azərbaycanın rabitə və informasiya texnologiyaları naziri Əli Abbasov Belarusun Azərbaycana yeni təyin olunmuş səfiri Nikolay Patskeviçlə görüşüb. Trend in nazirliyə istinadən xəbər verdiyi kimi, görüşdə nazir Azərbaycanın iqtisadi-siyasi inkişafını MDB məkanında özünəməxsus adlandırıb.
Səfirin sözlərinə görə, hökumət tərəfindən İKT-nin inkişafına göstərilən diqqət neft gəlirlərinin məqsədyönlü istifadəsi üzrə strategiyanın mövcudluğuna dəlalət edir. Azərbaycanda xüsusi iqtisadi zonaların yaradılması sahəsində görülən işləri yüksək qiymətləndirdiyini qeyd edən N.Patskeviç bildirib ki, prezidentin sərəncamına görə, analoji işlər Belarusda da həyata keçirilir.
Öz növbəsində nazir Azərbaycanın rabitə və İT sahəsində görüləcək tədbirlər, perspektivli layihələr haqqında məlumat verib. O, bu istiqamətdə Belarusla əməkdaşlıq imkanlarını da qeyd edib. Ə.Abbasov bildirib ki, Belarusun yeni təyin olunmuş rabitə və informatizasiya naziri Nikolay Panteley 2006-cı ilin oktyabrında keçiriləcək İT üzrə BakuTel2006 12-ci beynəlxalq sərgi və konfransa dəvət olunub.