"Oracle" korporasiyası və "Smart Systems Technology" "Tərəfdaşlıq haqqında" sertifikatın fəaliyyət müddətini uzadıblar. Bu barədə Trend ə "Smart Systems Technology"dən xəbər veriblər. Sertifikat daha bir il müddətinə uzadılıb.
"Oracle" tərəfdaşlıq şəbəkəsi haqqında saziş 2005-ci ilin sentyabrın 9-da şirkətin Rusiyadakı regional nümayəndəsi olan "RDTeX" şirkəti ilə imzalanıb.
Bir qədər əvvəl "Oracle" 2007-ci maliyyə ilndə Azərbaycanda ofis açmaq niyyəti barədə açıqlama verib.
Azərbaycanda ofis açmaq məsələsi fevralda "Azərbaycanda Oracle günləri" zamanı da "Oracle"ın vitse-prezidenti və MDB ölkələri üzrə baş direktoru Boris Şerbakov tərəfindən müzakirə olunub. Korporasiya təmsilçisi qeyd edib ki, Azərbaycanın İT bazarı cəlbedicidir və şirkət üçün Azərbaycan prioritet bazardır və burada Zaqafqaziyanın digər ödkələri ilə müqayisədə iqtisadiyyatda əhəmiyyətli artım açıq-aydın müşahidə olunmaqdadır.
"Oracle" 6 rəsmi tərəfdaş vasitəsi ilə Azərbaycanla əməkdaşlıq edir və bu günə qədər Prezident Aparatı, Maliyyə Nazirliyi, Daxili İşlər Nazirliyi, Dövlət Neft Fondu, Azərbaycanın Milli Bankı, "Azercell Telecom" BM, "Barmek Azerbaijan" və s. kimi ölkənin bir sıra dövlət müəssisələrində "Oracle" texnologiyaları tətbiq olunur.
"Smart Systems Technology" 1999-cu ilin noyabrında yaradılıb. Şirkət bank və maliyyə fəaliyyətinin kompleks avtomatlaşdırılması xidməti, telekommunikasiya şəbəkələrinin quraşdırılmasının layihələndirilməsi, mürəkkəb informasiya şəbəkələrinin işlənib hazırlanması, bank və maliyyə sahəsində konsaltinq xidməti, internet xidməti, müasir kommunikasiya avadanlıqlarının satışı ilə məşğuldur və "Oracle"ın rəsmi tərəfdaşıdır.
