Azərbaycanın Rabitə və İnformasiya Texnologiyaları Nazirliyi bu gün Moskvanın Ümumrusiya sərgi mərkəzində öz işinə başlamış "MDB-nin 15 illiyi: Əməkdaşlıq və inteqrasiya" sərgisində iştirak edir. Rabitə Nazirliyindən Trend ə verilən xəbərə görə, tədbirdə Rabitə Nazirliyini informasiya cəmiyyətinin inkişafı şöbəsinin müdiri Rüfət Gülməmmədov təmsil edir.
MDB-nin Sərgi -yarmarka fəaliyyəti üzrə Dövlətlərarası şurasının təşəbbüsü ilə MDB-nin İqtisadi şurası 23 may 2005-ci ildə "MDB-nin 15 illiyi: Əməkdaşlıq və inteqrasiya" dövlətlərarası sərginin keçirilməsi haqqında qərar qəbul edib. Sərgi Birlik dövlətlərinin ixrac potensialını təqdim edəcək, onların iqtisadiyyat, elm, texnika, səhiyyə, təhsil və mədəniyyət sahəsində son nailiyyətlərini nümayiş etdirəcək.
Təşkil olunan sərgi vahid iqtisadi məkanın formalaşması, texnoloji səviyyənin və istehsalatın rəqabət qabiliyyətinin yüksəldilməsi, Birlik çərçivəsində mənfəətli əməkdaşlığın və bərabər hüquqlu tərəfdaşlığın inkişafı üçün şəraitin yaradılmasında yardımın göstərilməsinə yönəldilib. Sərgi çərçivəsində "MDB-nin 15 illiyi: Yekunlar, problemlər və perspektivlər" mövzusunda Birliyin İqtisadi forumunun və Xalqların dostluq festivalının keçirilməsi planlaşdırılır.
Sərgi oktyabrın 28-dək MDB-nin İcra komitəsinin, MDB-nin iştirakçı-dövlət hökümətlərinin, MDB-nin sərgi-yarmarka fəaliyyəti üzrə dövlətlərarası şuranın, "Ümumrusiya sərgi mərkəzi"nin təşkilatçılığı ilə keçiriləcək. Sərgi iqtisadi, sosial və humanitar sahələrdə dövlətlərarası əməkdaşlığın inkişafı, sənaye və elmi-texniki sahədə kooperasiyanın inkişafına yardım, innovasiya məhsulunun MDB ölkələri bazarına çıxarılmasını təmin etmək, MDB ölkələri iqtisadiyyatının perspektiv sektorlarına sərmayə qoyuluşunun artmasına yardım məqsədilə keçirilir.
