Azərbaycan Rabitə və İnformasiya Texnologiyaları Nazirliyində rabitə və informasiya texnologiyaları sahəsində yeni normativ hüquqi aktlar və onların tətbiqi, nazirliyin bölmələri üzrə 2007-ci ilin büdcə layihəsi və investisiya proqnozları üzrə kollegiya iclası keçirilib.
Trend nazirliyə istinadən xəbər verir ki, iclasda rabitə və informasiya texnologiyaları naziri Əli Abbasov 2006-cı ildə görülmüş işlər, əldə olunan nəticələr barədə danışıb, xüsusilə dövlət başçısının sektorun inkişafına göstərdiyi xüsusi diqqət və qayğıdan söhbət açıb.
"Yeni normativ hüquqi aktlar və onların tətbiqi, icra intizamının möhkəmləndirilməsi və icraya nəzarətin təkmilləşdirilməsi tədbirləri haqqında" Fərmanın icrasının təmin edilməsi ilə bağlı nazirliyin hüquq və kadrlar şöbəsinin müdiri Bəxtiyar Məmmədov məruzə ilə çıxış edib və görülmüş işlər barədə ətraflı məlumat verib.
2007-ci ilin büdcə layihəsinin və investisiya proqnozlarının təsdiq edilməsi haqqında nazirliyin iqtisadi təhlil və mühasibat uçotu şöbəsinin müdiri Rəşad Nəbiyev danışıb.
