Azərbaycan bu gün Qazaxıstanın KazSat peykindən istifadə olunmasında maraqlı deyil. Bu barədə Trend ə cümə günü Azərbaycan Rabitə və İnformasiya Texnologiyaları Nazirliyinin dövlət müəssisələrinin fəaliyyətinin koordinasiyası şöbəsinin baş məsləhətçisi Qulam Abdullayev məlumat verib.
Onun sözlərinə görə, Qazaxıstan tərəfinin təklifləri Teleradio İstehsalat Birliyinə 2006-cı ilin yayında daxil olub.
"Biz hesab edirik ki, peykin ərazini əhatə etməsi səbəbindən KazSat peykindən istifadə Azərbaycan üçün səmərəli deyil. Bu gün biz böyük Avropa peyk şirkətlərinin xidmətlərindən istifadə edirik. Biz onlardan imtina edərək, əsasən Orta Asiya, Qafqaz, Rusiya Federasiyasının mərkəzi hissəsində yayımlanan Qazaxıstan peykinə keçsək, çox şey itirərik", - deyə mütəxəssis qeyd edib.
Qazaxıstanın KazSat peykinin xidmətlərindən istifadəyə görə təklif etdiyi tarif məsələsinə toxunan nazirliyin nümayəndəsi bildirib ki, onlar aşağı deyil.
"Hazırda Azərbaycanın öz ehtiyatları var və Qazaxıstan peykinin istifadəsinə kəskin ehtiyac duyulmur", - deyə Q.Abdullayev bildirib.
KazSat Rusiyanın "Proton" raket daşıyıcısının Baykonur kosmodromundan iyunun 18-də geostasionar orbitə buraxılıb.