Azərbaycan, Bakı, 11 iyul /Trend, müxbir E.İsmayılov/
Hazırda Azərbaycan "Azəri-Çıraq-Günəşli" yataqlar blokundan və "Şahdəniz" qaz-kondensat yatağından sutkada təqribən 17-18 milyon kubmetr qaz alır. Bu barədə bazar ertəsi Trend-ə neft-qaz bazarındakı mənbə deyib.
Əldə edilən qazın 9-10 milyon kubmetri sutka ərzində yeraltı qaz anbarlarına vurulur. Anbarlarda qaz ehtiyatlarının həcmi 2,1 milyard kubmetrə yaxındır.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%.
"Azəri-Çıraq-Günəşli" yataqlar blokunda hasilatın pay bölgüsü barədə saziş 1994-cü ildə imzalanıb. Layihənin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
ARDNŞ-nin hasil etdiyi qaz Azərbaycanın daxili tələbatının ödənilməsinə, ixrac əməliyyatlarının təmin olunmasına yönəldilir, eləcə də qazın bir hissəsi Azərbaycanın "Qaradağ" və "Qalmaz" yeraltı qaz anbaralrına vurulur.
