Azərbaycan, Bakı 10 yanvar / "Trend , müxbir D.Xatınoğlu/ BMT Təhlükəsizlik Şurasının tələblərinə baxmayaraq, İran hələ də uranın zənginləşdirilməsini dayandırmayıb və MAQATE rəhbərinin Tehrana səfəri bu məsələnin həllinə yönələcək. "MAQATE baş katibinin İrana səfəri rəsmi Tehrana son ultimatumdur" - deyə ABŞ eksperti Möhsün Sazegara Trend ə bildirib.
MAQATE-nin baş katibi Məhəmməd Əlbəradei yanvarın 12-də İrana səfər edəcək. BMT Təhlükəsizlik Şurası İrandan uranın zənginləşdirilməsini dayandırmağı tələb edir. Bununla əlaqədar rəsmi Tehran əleyhinə iki Qətnamə tətbiq olunsa da, İran nüvə planını dayandırmayıb. Indiyədək 5+1 ölkələri ortaq məxrəcə gəlməsələr də, İrana qarşı 3-cü Qətnamənin tətbiq edilib-edilməməsini müzakirə edirlər.
Sazegara cümə axşamı Vaşinqtondan telefonla bildirib ki, İranın nüvə planı Qərbdən başqa ərəb ölkələrində də böyük narahatlığa səbəb olub. "Son zamanlar ABŞ İrana qarşı çox yumşaq davranır və bu məsələ Ərəb Əmirliklərində narahatlıq yaradır ki, ABŞ İrana qarşı nüvə məsələsində güzəştə gedib və bu isə ərəblərin mənafeyinə ziddir. ABŞ prezidentinin regiona səfərində əsas məqsədi də ərəblərə təhlükəsizliklərinin təmin olunacağını vəd verməkdir.
Sazegaranın fikrincə, ABŞ İrana qarşı güzəştə getməyəcək. "ABŞ hələ də İran əleyhinə 3-cü Qətnamənin tətbiqinə çalışır və Əlbəradeinin İrana səfəri bu ölkəyə son xəbərdarlıqdır" - deyə Sazegara bildirib.
BMT Təhlükəsizlik Şurası İrandan uranın zənginləşdirilməsini dayandırmağı tələb edib. Rəsmi Tehran isə nüvə planında israrlı olaraq qalır və uranı zənginləşdirməyi öz qanuni haqqı hesab edir. BMT Təhlükəsizlik Şurası indiyədək İran əleyhinə iki Qətnamə tətbiq edib və 3-cü Qətnamə hazırda müzakirə olunur.
