Bakı. Trend:
Almaniyanın bütün quru sərhədlərində yoxlamaların tətbiqinə başlandığı sentyabrın 16-dan oktyabrın 6-dək olan dövrdə, ölkəyə icazəsiz giriş halları əvvəlki üç həftə ilə müqayisədə 13 faiz azalıb.
Trend-in verdiyi məlumata görə, bu müddət ərzində ölkəyə icazəsiz daxil olmağa cəhd edən 3,464 nəfər aşkar edilib, onların 2,073-ü sərhəddən geri qaytarılıb. Avqustun 26-dan sentyabrın 15-dək olan dövrdə isə 3,984 icazəsiz giriş cəhdi qeydə alınıb ki, bunlardan da 2,353-ü geri qaytarılıb.
Almaniyanın daxili işlər naziri Nansi Fezerin qərarına əsasən, sentyabrın 16-dan etibarən Fransa, Lüksemburq, Belçika, Danimarka və Niderland ilə sərhədlərdə də yoxlamalar başlayıb. Polşa, Çexiya və İsveçrə ilə sərhədlərdə yoxlamalar 2023-cü ilin oktyabrından, Avstriya ilə sərhədində isə 2015-ci ildən davam edir.
Sərhəd yoxlamalarının tətbiqindən sonra Lüksemburq, Belçika və Niderland ilə sərhədlərdə icazəsiz girişlərin sayı artıb. Eyni zamanda, bu il müvəqqəti yoxlamaların aparıldığı Almaniya-Fransa sərhədində icazəsiz girişlərin sayı 766-dan 567-yə düşüb.
Almaniyanın şərq sərhədlərində, yəni Polşa, Çexiya, İsveçrə və Avstriya ilə sərhədlərdə də icazəsiz girişlərin sayı sentyabrın 16-dan etibarən azalıb. Məsələn, Almaniya-Polşa sərhədində əvvəlki üç həftə ərzində etibarlı yaşayış icazəsi olmayan 847 nəfərin girişinin qarşısı alınmışdısa, bu say 631-ə enib.
Həmçinin, Avropa İttifaqının sərhəd nəzarəti agentliyi (Frontex) bu ilin ilk doqquz ayında Aİ-nin xarici sərhədlərinə icazəsiz girişlərin sayının 42 faiz azalaraq 166 minə yaxın olduğunu bildirib. Bu azalmanın səbəblərindən biri kimi, son aylarda Avropaya nizamsız şəkildə gələn miqrantların sayının azalması göstərilir.