Azərbaycan, Bakı, 27 iyun /Trend, müxbir İlhamə İsabalayeva/
"Ümid edirəm ki, biz hazırkı pilləni qoruyub saxlaya biləcəyik və Azərbaycanın idman tarixinə adımızı qızıl hərflərlə yaza biləcəyik". Trend-in məlumatına görə, bunu Azərbaycanın I Avropa Oyunlarında nümayəndə heyətinin sədri Könül Nurullayeva bu gün keçirilən mətbuat konfransında deyib.
K.Nurullayeva bildirib ki, əldə etdiyimiz uğur dövlətimizin, idmançıların uğurudur: "Mən çox böyük qürur hissi keçirirəm. Bu, bizim üçün böyük nailiyyətdir".
Nümayəndə heyəti qeyd edib ki, Azərbaycanın bu yarıslarda göstərdiyi nəticələr hamını çox sevindirir.
K.Nurullayeva bildirib ki, Azərbaycanın 2016, 2020-ci illərdə Olimpiya Oyunlarını keçirməsi ilə bağlı iddialar irəli sürülmüşdü: "Təəssüflər olsun ki, hər iki namizədliyimiz uğursuzluqla başa çatmışdı".
K.Nurullayevanın sözlərinə görə, iddiaların qəbul olunmamasında Azərbaycanda böyük miqyaslı idman tədbirlərinin keçirilməsi təcrübəsinin olmaması əsas gətirilib: "O ki qaldı namizədlik məsələsinə, Avropa Oyunlarından sonra öz mövqeyimizi bildirəcəyik".