Azərbaycan, Bakı, 28 iyun /Trend/
"Avropa Oyunlarını alovlandıran qığılcım məhz Odlar Yurdundan gəldi. Azərbaycan, sən bizim səmimi və qonaqpərvər ev sahibimiz oldun". Trend-in məlumatına görə, bunu Avropa Olimpiya Komitəsinin prezidenti Patrik Hikki birinci Avropa Oyunlarının rəsmi bağlanış mərasimində nitqi zamanı deyib.
O, qeyd edib ki, Prezident İlham Əliyevin və birinci xanım Mehriban Əliyevanın rəhbərliyi ilə Bakı-2015 ilk Avropa Oyunlarının Əməliyyat Komitəsi Avropada ən yaxşı kişi və qadın idmançılar üçün ən gözəl arenaları hazırladı: "İş fəaliyyətinin dəqiqliyi qızıl medal standartına uyğun oldu. Yeni gənc qəhrəmanlardan ibarət komandanı sizin gözəl könüllüləriniz formalaşdırdı. Bütün bunlar cəmi 30 ay ərzində təmin edildi. Burada yaratdığınız idman obyektləri gələcək illərdə atletlərinizə, xalqınıza və gənclərə xidmət edəcək. Belə bir böyük layihənin reallaşdırılmasında nümayiş etdirdiyiniz yekdilliyə görə hamınıza minnətdarıq".
P.Hikki Milli Olimpiya komitələrinə də təşəkkürünü bildirib: "Siz bu Oyunların Avropa idmanı üçün nə olduğunu gördünüz. Siz komandalarınızı idman arenalarında ən yüksək nəticələri əldə etmək üçün hazırladınız. Beynəlxalq və Avropa federasiyalarına minnətdarıq. Siz bu Oyunlara, innovasiyaya açıq fikirlə yanaşdınız. Biz birlikdə nümayiş etdirdik ki, müasir dövrün bu çox növlü idman tədbirləri hər bir şəhərin tələbat və istəklərinə cavab verə bilər. Avropa atletlərinə minnətdarlığımızı bildiririk. Siz ölkələrinizi və qitənizi şərəf və ləyaqətlə təmsil etdiniz. Oyunların böyüklüyünü yüksək idman nəticələri müəyyən edir. Siz bizə möhtəşəm idman bayramı bəxş etdiniz. Ümid edirəm ki, siz bu Oyunları həmişə xatırlayacaqsınız. Qələbəyə sevindiniz. Məğlubiyyətdən dərs götürdünüz. Siz Avropanın ən yaxşı idmançıları ilə yaşadıqdan, məşq etdikdən və yarışdıqdan sonra artıq Rio-2016 Olimpiya Oyunlarında bütün dünya qarşısında çıxışa hazırsınız".
Avropa Olimpiya Komitəsinin prezidenti vurğulayıb ki, Avropa fərqliliklər və böyük rəqabət, müxtəliflik, idman və yarışma qitəsidir: "Lakin burada, Avropa Oyunlarında biz ümumi inamla, ümumi bayraq altında toplaşdıq: idman və Olimpiya ideallarına doğru addımlamaq bizi ayıran yox, daha çox birləşdirən məkana aparır. Bu inam ondan ibarətdir ki, biz - Avropanın 50 ölkəsi hər dörd ildən bir iki möhtəşəm həftə ərzində birgə ola bilərik".
P.Hikki əlavə edib ki, bu, bütün gələcək Avropa Oyunlarının əsaslanacağı Oyunlar oldu. Bu cür tədbirin sarsılmaz və ilhamlandırıcı əsası qoyuldu: "Avropa Olimpiya ailəsinə və dünyadakı dostlarımıza tam əminliklə deyirəm: Azərbaycanın gələcəyi parlaqdır. Avropa Oyunların gələcəyi parlaqdır. Avropanın gözəl atletləri üçün gələcək parlaqdır. Beləliklə, indi mən minnətdarlıq, qürur və böyük nikbinlik hissi ilə Bakı-2015 ilk Avropa Oyunlarını bağlı elan edirəm. Sağ ol, Bakı! Sağ ol, Azərbaycan!"