...

Beynəlxalq Muğam Mərkəzində möhtəşəm “Yaradanlar və yaşadanlar” layihəsi uğurla davam edir

Mədəniyyət Materials 15 Dekabr 2018 02:43 (UTC +04:00)
Beynəlxalq Muğam Mərkəzində “Yaradanlar və yaşadanlar” layihəsi çərçivəsində keçirilən konsert xalq artisti, unudulmaz müğənni Rübabə Muradovanın yaradıcılığına həsr olunub
Beynəlxalq Muğam Mərkəzində möhtəşəm “Yaradanlar və yaşadanlar” layihəsi uğurla davam  edir

Trend-i buradan izləyin

Bakı. Trend:

Beynəlxalq Muğam Mərkəzində “Yaradanlar və yaşadanlar” layihəsi çərçivəsində keçirilən konsert xalq artisti, unudulmaz müğənni Rübabə Muradovanın yaradıcılığına həsr olunub.

Trend-in məlumatına görə, tədbir Azərbaycan Televiziyası və Radiosunun “Mədəniyyət” kanalının və Beynəlxalq Muğam Mərkəzinin birgə layihəsi çərçivəsində, Azərbaycan Respublikası Mədəniyyət Nazirliyinin dəstəyi ilə həyata keçirilmişdi.

Konsertdə xalq artistləri Səkinə İsmayılova - “Ay günahsız əzizim”, Nəzakət Teymurova - “Unuda bilmirəm”, Teyyub Aslanov - “Dumanlı Təbriz” pyesindən “Qönçələbin mahnısı”, Nazpəri Dostəliyeva - “Şur” təsnifi, əməkdar artistlər Almaz Orucova - “Sevəydin barı”, Arzu Əliyeva - “Nədən oldu”, ”İndi sevmirəm”, Azərbaycan Televiziyası və Radiosunun solistləri Pərviz Qasımov - “Gəl bizə yar”, Günay İmamverdiyeva -“Gecələr yuxusuz qoymusan məni” mahnılarını ifa etdilər. Konsertin son nömrəsi -“Səni qəmli görəndə ” mahnısı Nazpəri Dostəliyeva, Bəyimxanım Vəliyeva və Arzu Əliyevanın birgə ifalarında səsləndi.

İfaçıları xalq artisti Ağa Cəbrayıl Abasəliyevin bədii rəhbərliyi altında “Səadət” instrumental ansamblı müşayiət edirdi.

Tədbiri əməkdar artist Rəşad İlyasov aparırdı.

Konsert maraqla qarşılandı və gur alqışlarla sona yetdi.

Xatırladırıq ki, Beynəlxalq Muğam Mərkəzində muğamın, milli klassik, etnik və caz musiqisinin təbliği və inkişafı məqsədi ilə həyata keçirilən tədbirlər və möhtəşəm yaradıcılıq layihələri davam edir.

Dekabrın 18-də saat 19:00-da Beynəlxalq Muğam Mərkəzində Vaqif Mustafazadənin yaradıcılığına həsr olunmuş konsert keçiriləcək.

Xəbər lenti

Xəbər lenti