.jpg)
Bakı. Maksim Tsurkov - Trend:
Mən Bakıda keçiriləcək batut, ikili mini-batut və tamblinq üzrə Avropa çempionatında qızıl medala köklənmişəm.
Bunu Trend-ə Azərbaycan gimnastı Mixail Malkin deyib.
M.Malkinin sözlərinə görə, ilkin hədəf təsnifat mərhələsində təmiz çıxış etmək və finala çıxmaqdır.
Gimnast bildirib ki, ən əsas rəqiblər Danimarka, Rusiya və Böyük Britaniya idmançılarıdır:
”Bu idmançıların proqramlarının çətinliyi mənimki kimidir. Amma bizim proqramımız çətinliyinə görə ikincidir. Mənə yalnız təmiz çıxış etmək və qalib gəlmək qalır”.
Qeyd edək ki, 12-15 aprel tarixlərində Bakıda batut gimnastikası, ikili mini-batut və tamblinq üzrə Avropa çempionatı keçiriləcək. Milli Gimnastika Arenasında baş tutacaq sayca 26-cı olan bu çempionatda həm böyüklər, həm də gənclər proqramında 25 ölkənin iştirakı və hər 3 növ üzrə idmançıların ümumi sayının 400-dən çox olacağı gözlənilir.
Gimnastlar üçün doğma məkana çevrilmiş arenada 4 gün davam edəcək turnir özündə 4 növ yarışları - fərdi batut, sinxron batut, tamblinq və ikili mini-batutu birləşdirəcək.
Yarışların 1-ci və 2-ci günləri həm gənclər, həm də böyüklər arasında bütün növlər üzrə təsnifat mərhələləri baş tutacaq və komandalar arasında finallar keçiriləcək. 14 aprel tarixində isə gimnastlar (gənc və böyük) sinxron və fərdi proqramda təsnifat mərhələlərində çıxış edəcəklər. Avropa və dünya çempionatlarının formatına əsasən fərdi proqramda təsnifat 2 mərhələdən ibarət olduğundan, çempionat çərçivəsində batut gimnastikası üzrə fərdi yarışlarda finaldan öncə, ilk mərhələdə yaxşı nəticə göstərmiş 24 idmançı arasında yarımfinal mərhələsi də baş tutacaq. Turnirin son günü isə hər 4 növ üzrə finallarda (fərdi batut, sinxron batut, tamblinq və ikili mini-batut) medalçıların adları məlum olacaq.
Avropa çempionatının əsas özəlliyi isə odur ki, gənc gimnastlar 2018-ci ildə baş tutacaq Gənclər arasında Olimpiya Oyunlarına, böyük gimnastlar isə 2019-cu ilin Avropa Oyunlarına lisenziyanı məhz Bakıda əldə edə biləcəklər.
.jpg)
.jpg)
.jpg)