Azərbaycan, Bakı, 03 iyul / Trend , müxbir K.Zərbalıyeva/ Daxili İşlər Nazirliyinin əməkdaşları Neftçala rayon sakinindən 35 kiloqram həşiş götürüblər.
Narkotika, DİN-in Baş Narkotiklərlə Mübarizə İdarəsi və Biləsuvar RPŞ əməkdaşlarının keçirdikləri əməliyyat tədbirləri nəticəsində, iyulun 1-də Biləsuvar rayonunda əvvəllər məhkum olunmuş Ramiz Bağırovun idarə etdiyi "Mercedes" markalı avtomaşına baxış zamanı aşkarlanıb.
DİN-in mətbuat xidmətinin məlumatına görə, Bağırov və sərnişini, əvvəllər məhkum olunmuş Elvin Süleymanov saxlanılıb.
Onlar DİN-in Baş Mütəşəkkil Cinayətkarlıqla Mübarizə İdarəsinə təhvil veriliblər.
Şirvan şəhər polis şöbəsinin əməkdaşları isə, şəhər sakini Hikmət Ağayevə məxsus həyətyanı sahədən kultivasiya yolu ilə yetişdirilmiş, çəkisi 27 kiloqram 624 qram olan 45 ədəd çətənə kolu aşkar ediblər. Ağayevin evinə baxış zamanı 320 qram marixuana aşkarlanıb.
Hər iki fakt üzrə cinayət işi açılıb.
Trend -un arayışı:Bu ilin 5 ayı ərzində Azərbaycanda hüquq-mühafizə orqanları 550 kiloqramdan çox narkotik vasitəni qanunsuz dövriyyədən çıxarıblar. Bunun 397 kiloqramı həşiş, 94 kiloqramı tiryək, 36 kiloqramı marixuana, 23 kiloqramı heroindir.
Müəlliflə əlaqə saxlamaq üçün elektron ünvan - [email protected]
