Azərbaycan, Bakı, 17 noyabr / Trend , müxbir S. Kazımlı / Bakının Nəsimi rayonu ərazisində Azərbaycan parlamenti deputatının köməkçisinin avtomobilindən oğurluq edilib. Oğurluq edən şəxs 25 yaşlı xanımın xidməti vəsiqəsini və pulunu oğurlayıb. Bu barədə Nəsimi rayon Polis İdarəsindən bazar ertəsi Trend - a məlumat verilib.
Məlumata görə, noyabrın 16 - da saat 20:00 radələrində Feyzulla Qasımzadə küçəsində Bakı sakini Günel Hamlet qızı Rzayevaya məxsus "Şevrolet Aveo" markalı avtomobilin süşəsini sındırmaq yolu ilə içərisində 400 manat pul və iş vəsiqəsi olan çantası naməlum şəxs tərəfindən oğurlanıb. Rzayevanın Azərbaycan parlamentinin deputatlarının birinin köməkçisi olduğu bildirilir. Deputatın adı açıqlanmır.
Hazırda hadisəni törədən şəxsin müəyyən edilib tutulması üçün polis əməkdaşları tərəfindən əməliyyat - axtarış tədbirləri davam etdirilir.
Faktla bağlı Nəsimi rayon Polis İdarəsində Azərbaycan Cinayət Məcəlləsinin oğurluq, yəni özgənin əmlakını gizli olaraq talama (177.1 - ci) və vətəndaşın şəxsiyyət vəsiqəsini, pasportunu və ya digər mühüm şəxsi sənədini oğurlama (326.2- cı) maddələri ilə cinayət işləri başlanılıb, istintaq aparılır.
Məqalə müəllifi ilə əlaqə ünvanı:[email protected]
