Azərbaycan, Bakı, 09 mart / Trend , müxbir C.Babayeva /
Azərbaycanın Kürdəmir rayonu ərazisində (paytaxt Bakıdan 180 kilometr aralı) üç nəfərin ölümü və iki nəfərin xəsarət alması ilə nəticələnən ağır yol qəzası baş verib, - bazar ertəsi Trend -a Daxili İşlər Nazirliyinin Mətbuat Xidmətindən məlumat verilib.
Bazar günü saat 20.00 radələrində Kürdəmir rayonunun Meyniman kəndi ərazisində Yevlax rayon sakini Həmid Əfəndiyevin idarə etdiyi "VAZ-2107" markalı və Samux rayon sakini Siyavuş Məmmədovun idarə etdiyi "Kamaz" markalı avtomaşınlar toqquşublar. Nəticədə Əfəndiyevin idarə etdiyi avtomobildəki sərnişinlər - Oğuz rayon sakini Gülmayə Zakirova, Yevlax rayon sakinləri Fəridə Əfəndiyeva və Nizami Qurbanov hadisə yerində ölüb, xəsarət almış Əfəndiyev və digər sərnişin - qızı Səba Əfəndiyeva isə xəstəxanaya yerləşdiriliblər.
Kürdəmir RPŞ tərəfindən araşdırmalar aparılır.
Azərbaycanda bu, son bir həftədə üçüncü ağır yol nəqliyyat hadisəsidir. Ötən həftə Bakıda baş verən yol qəzası nəticəsində 5 nəfər, İmişli rayonunda isə avtomobilin su kanalına düşməsi nəticəsində 4 nəfər ölüb.
Məqalə müəllifi ilə əlaqə ünvanı: [email protected]