Azərbaycan, Bakı, 7 iyul /Trend, müxbir İlkin İzzət/
2015-ci ilin əvvəlindən iyulun 7-dək Azərbaycanda boğulma təhlükəsi ilə üzləşən 79 nəfər xilas edilib.
Bu barədə Trend-ə Fövqəladə Hallar Nazirliyinin (FHN) Dövlət Sularda Xilasetmə Xidmətinin (DSXX) Təbliğat və təşkilat sektorundan bildiriblər.
Məlumata əsasən, bunlardan 38 nəfəri qeyri-çimərlik ərazisində, 41 nəfəri isə çimərlik ərazisində xilas edilib.
DSXX-nin Xilasetmə məntəqələrinin fəaliyyət göstərdiyi çimərlik ərazisində indiyədək suda boğulma hadisəsi baş verməyib.
Qeyd edilib ki, çimərlikdə istirahət edən insanlar xoşagəlməz hallarla üzləşməmək üçün bu qaydalara mütləq riayət etməlidirlər:
- Çimərlikdə 13 yaşdan aşağı uşaqları nəzarətsiz qoymaq olmaz!
- Sərxoş halda çimərlik ərazisinə daxil olmaq və çimərlikdə spirtli içki qəbul edib suya girmək qadağandır!
- Qadağan olunmuş yerlərdə çimmək olmaz!
- Su obyektləri və onların sahillərini məişət və digər tullantılarla çirkləndirmək qadağandır!
- Uşaqlara çimərlikdən yalnız valideynlərin müşayəti ilə istifadə hüququ verilir!
- Su hövzələrində, çimərlikdə qadağanedici xəttlərdən uzağa üzmək qadağandır!
- Çimərlik ərazisində balıq tutmaq və tor atmaq olmaz!
- Çimərlik ərazisinə qayıqların və kiçik həcmli gəmilərin daxil olması qadağandır!
- Çimərlik ərazisində xilasedicilərin tələblərinə sözsüz əməl olunmalıdır!
