Azərbaycan, Bakı, 01 mart / Trend , müxbir A.Hüseynbala/
Azərbaycan Parlamentinin komitə sədrinin fikrincə, Ermənistan nümayəndə heyəti ATƏT-in Parlament Assambleyasının yay sessiyasında münaqişələrin həllində güc tətbiqindən imtina haqqında sənədi qəbul etdirə bilməyəcək.
"Hər bir ölkə ATƏT PA-nın sessiyalarında müzakirə üçün müəyyən sənədlər təqdim edə bilər, amma Azərbaycan qeyd edilən sənədin qəbuluna imkan verməyəcək", - bazar ertəsi Trend -a Milli Məclisin İnsan haqları komitəsinin sədri, Azərbaycanın ATƏT PA-da nümayəndə heyətinin üzvü Rəbiyyət Aslanova bildirib.
Trend -un arayışı: Ermənistanın ATƏT PA-dakı nümayəndə heyəti qurumun yay sessiyasına münaqişələrin həllində güc vasitələrindən istifadədən imtina edilməsi barədə sənəd təqdim etmək niyyətindədir.
Aslanovanın sözlərinə görə, Ermənistan Azərbaycanın Dağlıq Qarabağ münaqişəsi sülh yolu ilə həll olunmayacaqsa, müharibə variantından istifadə edəcəyi barədə bəyanatından qorxaraq belə bir məsələni ATƏT-in gündəminə gətirmək istəyir.
"Bu, onların uğursuz cəhdidir. Ona görə ki, Azərbaycan tərəfi həmin sənədin əleyhinə çıxacaq və biz haqlı olduğumuzu sübuta yetirəcəyik. Əgər Azərbaycanın haqlı tələbləri beynəlxalq təşkilatlar tərəfindən gerçəkləşməyəcəksə, bu məsələyə real qiymət verilməyəcəksə, müharibə istisna edilmir. Biz bu məsələdə israrlıyıq və bunu həm ATƏT PA-da, həm də digər beynəlxalq təşkilatlarda söyləyəcəyik. Beynəlxalq təşkilatlar öz iradəsini ortaya qoyub problemi həll etməlidir, əks halda problemin həllində müharibə variantından istifadə edəcəyik", - komitə sədri əlavə edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Məqalə müəllifi ilə əlaqə ünvanı: trend@trend.az/
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
.jpg)
