Bakı. Trend:
ABŞ-nin İranın nüvə mərkəzlərinə hücumu nəticəsində mərkəzlərə və avadanlıqlara ciddi şəkildə ziyan dəyib.
Trend-in məlumatına görə, bunu İran prezidenti Məsud Pezeşkian xarici mediaya açıqlamasında deyib.
Onun sözlərinə görə, hazırda İranın həmin obyektlərə heç bir çıxışı yoxdur və hələlik hər hansı qiymətləndirmə də mövcud deyil.
Pezeşkian bildirib ki, nüvə mərkəzlərinin zədələnmə dərəcəsi müəyyənləşdirildikdən sonra onların nəzarət altına alınması barədə qərar vermək mümkün olacaq.
İran prezidenti deyib ki, İranın nüvə proqramına nəzarətlə bağlı heç bir zaman problemi olmayıb. Çünki İran həmişə yoxlama və nəzarətə hazır olduğunu bəyan edib. Bununla bağlı danışıqlar da aparmaq istədiyini qeyd edib.
Xatırladaq ki, 13 iyun səhər saatlarında İsrail İrana hərbi hava zərbələr endirib. Zərbələr nəticəsində çoxlu sayda yüksək səviyyəli hərbçi, generallar, nüvə alimləri və başqa yüksək səviyyəli rəsmilər ölüb.
Elə həmin günün axşamı, İran “Doğru Vəd III” əməliyyatı ilə İsrailə cavab verib: Tel-Əviv daxil olmaqla bir çox yerlərə yüzlərlə ballistik raket, pilotsuz uçuş aparatı buraxılıb, bu da mülki itkilərə və geniş-miqyaslı dağıntılara yol açıb.
Xatırladaq ki, 22 iyunda ABŞ İranın üç nüvə obyektinə hərbi hava hücumları edib. Hava hücumları nəticəsində İranın nüvə obyektlərinin məhv edildiyi qeyd olunub.
Əlavə edək ki, 23 iyun axşam saatlarında İran ABŞ-nin Qətərdəki hərbi bazasına hava zərbələri endirib.
24 iyunda İsrail baş nazirinin ofisi İsrail hökumətinin ABŞ prezidenti Donald Trampın vasitəçiliyi ilə İranla atəşkəsə razılaşdığını elan edib.
İranın Ali Milli Təhlükəsizlik Şurası da bəyanat yayaraq hücumların dayandırıldığını qeyd edib.