Azərbaycan, Bakı, 8 iyun / Trend müxbir M. Əliyev/
BMT cəbhə bölgəsində vəziyyətin gərginləşməsindən təəssüflənir.
"Heç kim cəbhə bölgəsində gənclərin həlak olmasını istəmir. 20 ildir ki, cəbhə bölgəsində gənclər həlak olur, qaçqın və köçkünlər problemlər yaşayır", - Trend-in məlumatına görə, bunu cümə günü jurnalistlərə BMT-nin Azərbaycandakı rezident əlaqələndiricisi Fikrət Akçura deyib.
Akçura bu illər ərzində ATƏT-in Minsk qrupunun səyləri, həmçinin Azərbaycanın BMT-nin Təhlükəsizlik Şurasına üzvlüyü nəticəsində münaqişənin həll olunacağına ümidvar olduğunu deyib.
Qeyd edib ki, Azərbaycan BMT TŞ-yə üzv olduğu üçün Nyu-Yorkda əməkdaşlarının sayı artıb və onların səyləri nəticəsində bu problem həll oluna bilər.
Akçura, həmçinin Aqşin Mehdiyevin BMT-nin baş katibinə cəbhə bölgəsindəki gərginliklə bağlı məktub göndərdiyini bildirib.
Qeyd edək ki, son günlər cəbhədə atəşkəs rejimi intensiv pozulur. Nəticədə Azərbaycan və Ermənistanın silahlı qüvvələri itki verib.