"Ermənistan Dağlıq Qarabağın müstəqillyini tanımağa cəsarət edə bilməz". Bu barədə Trend ə politoloq Vəfa Quluzadə bildirib.
Qeyd edək ki, "Medimaks" agentliyinin bildirdiyinə görə, Ermənistan prezidenti Robert Koçaryan tərəflərin Dağlıq Qarabağ probleminin həllində ümumi razılığa gəlinməyəcəyi təqdirdə rəsmi İrəvanın Qarabağın müstəqil dövlət kimi tanıyacağını bəyan edib.
V.Quluzadə onu da bildirib ki, R.Koçaryan bu bəyanatla Azərbaycana təzyiq göstərmək niyyətindədir: "Burada da rəsmi Moskvanın əli var. Rusiya Azərbaycanı Özbəkistanın vəziyyətinə sala bilmədiyindən Koçaryanı dindirir. Ancaq buna müvəffəq olmayacaqlar".
Politoloq Aydın Mirzəzadə də həmkarının fikirlərini qismən dəstəkləyib: "Ermənistan istəsəydi bu vaxta qədər Dağlıq Qarabağın müstəqilliyini tanıyardı. Neçə ildir ki, özü bunu dünyadan tələb edir. Azərbaycanın məlum problemlə bağlı qətiyyətli mövqeyini bilən Ermənistan prezidenti növbəti gediş etməklə belə bir bəyanat verib".
A.Mirzəzadə onu da bildirib ki, R.Koçaryanın belə bəyanatı bir neçə gün medianın mövzusu olacaq, sonradan unudulacaq: "Çünki ciddi və məntiqsiz fikirdir".