Azərbaycan, Bakı, 25 fevral / Trend , müxbir S.İlhamqızı/ Müxalifətçi Azərbaycan Demokrat Partiyasının sədri Sərdar Cəlaloğlunun namizədliyi ətrafında seçki bloku yaradılacaq. Bu barədə Trend -a Cəlaloğlu özü məlumat verib.
ADP-nin Ali Məclisinin fevralın 16-da keçirilən iclasında partiyanın sədri Sərdar Cəlaloğlunun builki prezident seçkisində namizədliyinin irəli sürülməsinə qərar verilib.
Cəlaloğlu bildirib ki, artıq başqa müxalifət partiyalarından onun namizədliyini dəstəkləyəcəyini bildirənlər var. Lakin ADP sədri bu partiyaların adlarını açıqlamayıb: "ADP-nin prezidentliyə namizədini dəstəkləyən qüvvələrin blokunun yaradılması barədə bizə təkliflər edilib və bu məsələ hazırda müzakirə olunur. Belə bir blokun yaradılması gözlənilir"-deyə Cəlaloğlu bildirib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib.
Cəlaloğlu prezident seçkisində ilk dəfə olaraq iştirak edəcək.