Azərbaycan, Bakı, 10 mart/ Trend , müxbir İ.Əlizadə/ Azərbaycanın müxalifətyönlü "Azadlıq" qəzetinin həbsdə olan baş redaktoru Qənimət Zahidin vəkilləri Yasamal Rayon Məhkəməsinin hökmündən apellyasiya şikayəti verməyə hazırlaşırlar. "Sabah hökmün surətini alandan sonra apellyasiya şikayəti hazırlayacağıq. Şikayətdə məhkəmədə baş vermiş qanunsuzluqlara toxunulacaq", -deyə bazar ertəsi Zahidin vəkili Rəşid Hacılı bildirib.
"Azadlıq" qəzetinin baş redaktoru Qənimət Zahid martın 7-də Yasamal Rayon Məhkəməsinin hökmü ilə 4 il müddətinə azadlıqdan məhrum edilib. Baş redaktorun həbsinə noyabrın 7 - də saat 16 radələrində "Azadlıq" qəzeti redaksiyasının yerləşdiyi "Azərbaycan" nəşriyyatının binası qarşısında baş vermiş insident səbəb olub. Sevgiladə Quliyeva və Vüsal Həsənov adlı iki nəfərlə Zahid arasında yaranan mübahisə əlbəyaxa dava ilə nəticələnib. Həmin gün Yasamal Rayon Polis İdarəsinə müraciət edən Həsənov məhkəmə-tibb ekspertizasından keçib və ona kəllə-beyin travması aldığı barədə rəy verilib.
Baş redaktor Cinayət Məcəlləsinin qəsdən sağlamlığa az ağır zərər vurma və xuliqanlıq cinayətlərində şübhəli bilinərək, noyabrın 11-də Bakının Yasamal rayon məhkəməsinin qərarı ilə 2 ay müddətinə həbs olunub.
Vəkilləri və beynəlxalq jurnalist təşkilatları Zahidin dərhal azad olunmasını tələb edirlər.
"Şikayətə daha çox hadisənin əvvəlcədən, sifarişlə hazırlanmasını sübut edən faktların məhkəmədə araşdırılmaması, hökmü ağırlaşdıran səbəb kimi göstərilən Qənimət Zahidin guya Vüsal Həsənova vurduğu zərbənin əslində sübut olunmamasıyla bağlı faktlar daxildir", - deyə vəkil əlavə edib.
Hökmün vəkillərin iştirakı olmadan çıxarılması da şikayətdə əsas qanun pozuntularından biri kimi vurğulanacaq.
Hacılının sözlərinə görə, apellyasiya şikayətinə baxılanadək Qənimət Zahid Bayıl təcridxanasında saxlanacaq.
Vüsal Həsənov isə, məhkəmədə bildirib ki, Zahid Sevgiladə Quliyevaya söz atıb və ona görə aralarında mübahisə yaranıb. Mübahisə davaya çevrilib və baş redaktor ona xəsarət yetirib.
Dövlət ittihamçısı məhkəmədə bildirib ki, Zahidin günahı sübuta yetirilib.