Azərbaycan, Bakı, 30 aprel/ Trend , müxbir İ.Əlizadə/ Almaniyanın Bavariya bölgəsi parlamentinin nümayəndə heyəti Azərbaycanla əməkdaşlıq məsələlərini Bakıda müzakirə edəcək. "Almaniyanın Bavariya bölgəsi parlamentinin nümayəndə heyətinin cümə günü Azərbaycana səfəri başlayır. Səfərdə məqsəd Azərbaycanla Bavariya bölgəsi arasında ikitərəfli iqtisadi əməkdaşlığın inkişaf perspektivləri və parlamentlər arasında təcrübə mübadiləsi imkanlarını müzakirə etməkdir", -deyə çərşənbə günü Trend -a Azərbaycan Parlamentinin mətbuat xidmətindən bildirilib. Nümayəndə heyətinə Bavariya parlamentinin deputatı, dövlət büdcəsi və maliyyə məsələləri üzrə komissiyanın sədri Manfred Ax rəhbərlik edir. Bavariyalı parlamentarilərin səfər çərçivəsində Milli Məclisin birinci vitse-spikeri Ziyafət Əsgərov, iqtisadi inkişaf nazirinin müavini Mikayıl Cabbarov, maliyyə naziri Samir Şərifov, Milli Məclisin deputatları və Azərbaycan-Almaniya dostluq qrupunun üzvləri ilə görüşləri nəzərdə tutulub.
Bavariyalı deputatlar həmçinin, Heydər Əliyev Fondunda olacaq, Azərbaycan Milli Elmlər Akademiyası yanında Tarix Muzeyinə baş çəkəcəklər.
Səfər mayın 5-də başa çatacaq.
Məqalə müəllifi ilə əlaqə ünvanı: [email protected]
