Azərbaycan, Bakı, 05 may/ Trend , müxbir İ.Əlizadə/ Azərbaycan müxalifətini təmsil edən İslam Partiyası payızda keçiriləcək prezident seçkilərində iştirak etməklə bağlı qərar verməyi təxirə salıb. "Biz bəyan etmişdik ki, İslam Partiyasının prezident seçkilərində iştirakı Ədliyyə Nazirliyinin təşkilatı dövlət qeydiyyatına alıb-almamasından asılı olacaq. Ədliyyə Nazirliyi İslam Partiyasını qeydiyyata almaq üçün yeni sənədlər tələb edir. Ona görə də partiyanın Baş Məclisi prezident seçkilərində iştirakla bağlı qərar qəbul etməyi qeyri-müəyyən vaxtadək təxirə salıb", -deyə bazar ertəsi Trend -a Azərbaycan İslam Partiyasının rəsmisi Akif Heydərli bildirib.
Dini təmayüllü, müxalifətyönlü İslam Partiyası 1991-ci ilin avqustunda təsis olunub, 1992-ci ildə Ədliyyə Nazirliyində qeydiyyata alınıb. 1995- ci ildə partiya dövlət əleyhinə fəaliyyət göstərməkdə ittiham olunaraq qeydiyyatı ləğv edilib.
Bazar günü İslam Partiyası Baş Məclisinin növbəti iclası keçirilib. İclasda partiyanın prezident seçkilərində iştirakı və təşkilati məsələlər müzakirə olunub.
"Ədliyyə Nazirliyi partiyanı dövlət qeydiyyatına alsa, Baş Məclisin fövqəladə iclası keçiriləcək və prezident seçkilərində iştirakla bağlı qərar veriləcək. Biz prezident seçkilərində iştirak etmək istəyirik", - deyə partiya rəsmisi əlavə edib.
Onun sözlərinə görə, nazirlik partiya sədrinin yeni təyin olunan müavinlərinin şəxsi sənədlərini, partiyanın təsis protokolundan çıxarış tələb edir.
Məqalə müəllifi ilə əlaqə ünvanı: [email protected]
