Azərbaycan, Bakı, 0 may/ Trend , müxbir E.Babayev/ Azərbaycanın siyasi xadimləri hesab edirlər ki, yaxın gələcəkdə partiyaların birləşməsi prosesi başlayacaq. "Partiyalar cəmiyyətdə müəyyən təbəqələşmə getdlikdən sonra yaranmalıdır. Yəni ayrı-ayrı təbəqələşmə getməlildir və partiyalar da bu təbəqələrin iradəsini ifadə edərək yaranmalıdır" deyə müxalif Ədalət Partiyasının sədri, millət vəkili İlyas İsmayılov cümə axşamı Trend a bildirib.
Azərbaycanda dövlət qeydiyyatından 52 siyasi partiya keçib. Bunlardan 20-yə yaxını aktiv siyasətlə məşğul ola bilir.
İsmayılov deyib ki, Azərbaycanda partiyalar vaxtından bir qədər qabaq, ayrı-ayrı şəxslərin ətrafında meydana gəlməyə başlayıb. "Klassik parlamentarizm ölkəsi olan İngiltərədə ənənəvi olaraq bir Leyboristlər Partiyası - xırda burjuaziyanın maraqlarını ifadə edən, bir də Mühafizəkarlar Partiyası -iri burjuaziyanın maraqlarını ifadə edən partiya var. Sonradan da liberal düşüncəli insanlar ortaya çıxdı və Liberal Partiyası yarandı. Azərbaycanda da bu cür praktikanın tətbiqi labüddür", deyə o vurğulayıb.
İqtidaryönlü Ana Vətən Partiyasının (AVP) sədri, millət vəkili Fəzail Ağamalı cümə axşamı Trend a bildirib ki, Azərbaycanda yaxın gələcəkdə xırda partiyaların sıradan çıxması prosesi başlayacaq. "Əslində, bu gün Azərbaycanda bir neçə aparıcı partiya fəaliyyətdədir və siyasi mübarizə də onların arasında gedir" - deyən Ağamalının sözlərinə görə, zərurət olacağı təqdirdə AVP hakim Yeni Azərbaycan Partiyasına birləşmək istiqamətində addım ata bilər.
YAP İdarə Heyətinin üzvü, Milli Məclisin vitse-spikeri Bahar Muradova isə Trend a deyib ki, yaxın gələcəkdə Azərbaycanın kiçik siyasi partiyaları sıradan çıxacaq və Azərbaycanda da digər ölkələrdəki kimi bir neçə partiyanın mövcudluğu prosesi yaşanacaq.
Məqalə müəllifi ilə əlaqə ünvanı: [email protected]
