Azərbaycan, Bakı, 12 may / Trend , müxbir C.Babayeva/ Azərbaycanın eks-spikeri Rəsul Quliyevin lideri olduğu Açıq Cəmiyyət Partiyasının (ACP) Xaçmaz rayon təşkilatının bütün üzvləri istefa verərək siyasi fəaliyyətlərini Azərbaycan Yolu Siyasi Hərəkatında (AYSH) davam etdirmək barədə qərar qəbul ediblər. Bu barədə rayon təşkilatından bazar ertəsi Trend -a daxil olan bəyanatda bildirilib.
"Qarşılıqlı ittihamlar, əksər hallarda partiyanın qeyri-sivil mübarizə metodundan yararlanması və siyasi mübarizənin məişət müstəvisində təhqirlərə qədər enməsi cəmiyyətdə ACP-yə qarşı inamsızlıq doğurub. Azərbaycan Demokrat Partiyasının parçalanmasından sonra bu inamsızlıq özünü daha qabarıq şəkildə büruzə verib", deyə bəyanatda qeyd olunub.
Bəyanat müəlliflərinin sözlərinə görə, Azərbaycanda gedən siyasi proseslər yeni siyasi güc mərkəzinin yaradılmasını zəruri etdiyinə görə, siyasi fəaliyyətin Azərbaycan Yolu Siyasi Hərəkatında davam etdirilməsi barədə qərar qəbul olunub və bu proses davam etməkdədir.
ACP-nin Xaçmaz rayon təşkilatının sədri Şərqiyə Nurəliyevanın Trend -a bildirdiyinə görə, partiyadakı durğunluq rayon təşkilatının siyasi kursunu dəyişmək barədə qərar qəbul etməsinə təsir göstərib və rəhbərlik etdiyi rayon təşkilatı bütövlükdə AYSH-yə keçib.
ACP sədrinin müavini Yaqub Abbasov Trend -a Xaçmaz rayon təşkilatının istefa verməsi barədə məlumatı olmadığını bildirib. Nurəliyevanın Xaçmaz rayon təşkilatının sədri olduğunu təsdiqləyən Abbasov rayon təşkilatı üzvlərinin partiyanı tərk etmələrini onların öz işi olduğunu bildirib.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. 2007-cı ilin fevralınadək ADP-nin sədri olmuş Rəsul Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə saxlamaq üçün ünvan - [email protected]
