Azərbaycan, Bakı, 30 may / Trend , müxbir C.Babayeva/ Qarabağ Azadlıq Təşkilatı (QAT) üçüncü qurultayını mayın 31-də Qarabağda açıq havada keçirəcək. Bu barədə cümə günü Trend -a QAT sədri Akif Nağı məlumat verib.
Nağının sözlərinə görə, Ağdam, Bərdə, Tərtər rayon icra hakimiyyətləri qurultaya yer ayırmayıblar. "Hər üç rayonda qurultayın keçirilməsi üçün açıq havada yerlər müəyyən olunub. Qurultayın açıq havada keçiriləcəyini nəzərə alaraq qurultayda 200-250 nəfər iştirak edəcək", deyə Nağı bildirib.
Onun sözlərinə görə, qurultayda QAT-ın sədri və rəhbər orqanlarının üzvləri seçiləcək.
Nağının qeyd etdiyi kimi, bu günə qədər QAT sədrliyinə namizədliyini irəli sürənlər olmasa da, qurultayın gedişində namizədlərin irəli sürüləcəyi gözlənilir. QAT sədri qurultay zamanı polislə hər hansı bir qarşıdurmanın yaranmayacağına ümidvar olduğunu bildirib.
Trend -un arayışı: QAT Qarabağın erməni işğalçılarından azad olunması üçün ictimai mübarizəni təşkil etmək məqsədilə 2000-ci ildə Bakıda yaradılıb. Qurumun rəhbəri tarix elmləri namizədi, dosent Akif Nağıdır. Təşkilat öz sıralarında Azərbaycanın tanınmış ziyalıları, qaçqın və məcburi köçkünləri, gənclər, keçmiş döyüşçülər, ehtiyatda olan yüksək rütbəli zabitlər olmaqla 10 min nəfəri birləşdirir. QAT-ın Azərbaycan üzrə 74 yerli şöbəsi və müxtəlif xarici ölkələrdə təmsilçiləri fəaliyyət göstərir. Təşkilatın sonuncu qurultayı 2003-cü ildə keçirilib.
Məqalə müəllifi ilə əlaqə saxlamaq üçün ünvan - trend