Azərbaycan, Culfa, 03 iyun / Trend , müxbir M.Quliyev/ Azərbaycan rəhbərliyi bundan sonra da Naxçıvan Muxtar Respublikasına (NAR), xüsusilə də onun enerji təhlükəsizliyinə diqqət və qayğısını göstərməyə davam edəcək. Bu haqda Azərbaycan prezidenti İlham Əliyev çərşənbə axşamı Muxtar Respublikanın Culfa rayonuna səfəri zamanı bildirib.
Prezident Əliyev Culfa Mərkəzi xəstəxanasının açılış mərasimində çıxışı zamanı bildirib ki, Naxçıvan Muxtar Respublikasında qaz anbarının tikintisi gedir ki, bu da onun istifadəyə verilməsindən sonra Muxtariyyətin enerji təhlükəsizliyini təmin edəcək.
Prezident qeyd edib ki, Naxçıvan Muxtar Respublikasınnın müdafiə qabiliyyətini gücləndirmək məsələsi də gündəlikdədir.
İlham Əliyev bildirib ki, Azərbaycan son üç ildə iqtisadi inkişaf üzrə dünyada birinci yeri tutur. Onun sözlərinə görə, bu dövr ərzində dövlət xərcləri üç dəfə artıb, ümumi büdcə hazırda 16 mlrd. dollar təşkil edir.