Azərbaycan, Bakı, 07 iyun/ Trend , müxbir C.Babayeva/ Azərbaycan Ziyalıları Birliyinin sədri Eldəniz Quliyev müxalifətin birliyə nail olmamasının başlıca səbəbini müxalifət liderlərində görür. "Müxalifət düşərgəsində birlik və səmimiyyət yalnız regionlarda olan sıravi üzvlər arasında müşahidə olunur. Paytaxtda bir-birini qəbul etməyən müxalifət partiyalarının regionlardakı sıravi üzvləri hətta bir qərargahda fəaliyyət göstərir", - deyə şənbə günü Trend -a Quliyev bildirib.
Onun bildirdiyinə görə, Azərbaycan Ziyalılar Birliyi demokratik qüvvələrin şurasını yaratmaq təklifilə 50-yə yaxın siyasi partiya və qurumlara müraciət ünvanlayıb.
"Şura tərəfindən yeni təfəkkür müstəvisində mübarizə aparmağın sivil yolları, prezident seçkisində saxtakarlığa yol verilməməsi üçün görüləcək tədbirlər müzakirəyə çıxarılmalı idi. Ziyalılar isə həmin şurada müşahidəçi funksiyasını yerinə yetirəcəkdi. Çox təəssüf ki, müraciətimizə yalnız 14-15 siyasi təşkilatın razılıq cavabını aldıq", - deyə Quliyev bildirib.
Quliyevin fikrincə, demokratik qüvvələrin birliyi modeli birgə mübarizə olmalıdır.
"Bir əqidə ətrafında mübarizə strategiyası hazırlanmalıdır. Strategiyada xalqın mənafeyini əsas götürərək mübarizə aparmaq lazımdır. Özünü hətta "ana müxalifət" adlandıran partiyalar da xalqın mənafeyini düşünmürlər", - deyə Quliyev qeyd edib.
Məqalə müəllifi ilə əlaqə saxlamaq üçün ünvan - trend
