Azərbaycan, Bakı, 09 iyun / Trend , müxbir R.Hafizoğlu/ İraqın Baş naziri Nuri əl-Malikinin ABŞ-İraq təhlükəsizlik müqaviləsini müzakirə etmək üçün Tehrana rəsmi səfəri İranın təşəbbüsü ilə həyata keçirilir . "İraqın Baş naziri Nuri əl-Malikinin İrana rəsmi səfəri Tehranın təşəbbüsü ilə həyata keçirilir" -deyə iraqlı millət vəkili Fövzi Əkrəmoğlu Trend -a bildirib.
İraqın Baş naziri əl-Maliki iyunun 7-8-də İrana rəsmi səfər edib. Səfər çərçivəsində əl-Maliki İran prezidenti Əhmədinejat və ölkənin Ali dini rəhbəri Xameneyi ilə görüşüb, İraq-ABŞ arasında imzalanacaq təhlükəsizilk müqaviləsi müzakirə edilib.
"Əl-Malikinin İrana səfərində əsas məqsəd ABŞ və İraq arasında təhlükəsizlik sahəsində imzalanacaq müqaviləni müzakirə etməkdir" - deyə Əkrəmoğlu Bağdaddan telefonla bildirib.
Politoloq hesab edir ki, İran haqlı olaraq Bağdadla Vaşinqton arasında təhlükəsizliyə dair imzalanacaq müqavilədən ehtiyat edir.
"ABŞ və İraq arasında imzalanacaq müqavilə nəinki iraqlıların gələcəyi, həmçinin digər region dövlətlərinin gələcəyi üçün təhlükəlidir" - deyə millət vəkili əlavə edib. Onun fikrincə,Vaşinqton və Bağdad arasında təhlükəsizlik məsələləri üzrə imzalanması ehtimal edilən müqavilə ölkədəki koalisiya qüvvələrinin qeyri-məhdud müddətə İraqda qalması ilə nəticələnəcək.
"Vaşinqton ilə Bağdad arasında İraqın təhlükəsizliyi məsələsinə dair imzalanacaq müqavilənin ölkənin gələcəyi üçün heç bir ciddi əhəmiyyəti yoxdur" - deyə Əkrəmoğlu qeyd edib.
Onun fikrincə, işğalçılarla təhlükəsizlik müqaviləsinin imzalanması heç bir məntiqi əsasa sığmır.
2003-cü ilin mart ayında ABŞ koalisiya qüvvələrinin dəstəyi ilə İraqa hərbi müdaxilə edib.
Müxtəlif kütləvi informasiya vəsitələrində İraqda müharibə başlayandan bu günə qədər ölən və itkin düşənlərin ümimi sayı 350 min, bəzi məlumatlara görə isə 4 milyon göstərilməkdədir.
Məqalənin müəllifi ilə [email protected] ünvanı ilə əlaqə saxlaya bilərsiniz.