Azərbaycan, Bakı, 17iyun / Trend , müxbir E.Babayev/ Azərbaycanın müxalif Vətəndaş Birliyi Partiyası (VBP) prezident seçkisində dəstəkləyəcəyi namizədin adını açıqlayıb. "Partiyanın namizədi olmayacaq və biz birmənalı olaraq hakimiyyətin namizədi İlham Əliyevi dəstəkləyəcəyik", çərşənbə axşamı Trend -a VBP-nin sədri, millət vəkili Sabir Hacıyev bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Hacıyev vurğulayıb ki, gələn ay partiyanın qurultayı keçiriləcək. "Rayon təşkilatlarında qurultaya hazırlıq üzrə konfranslarda hakimiyyətin namizədi dəstəklənir. Bu gün hakimiyyətdə olan siyasi təşkilat xalqın maraqları üçün çalışır", - deyə Hacıyev əlavə edib.
Məqalə müəllifi ilə əlaqə ünvanı: [email protected]
