Azərbaycan, Bakı, 25 iyun/ Trend , müxbir E.Babayev/Azərbaycanın müxalif Ədalət Partiyasının rəhbəri qarşıdan gələn prezident seçkisini boykot etməyəcəklərini açıqlayıb. "Hər bir partiyanın strategiyası, taktikası var və başqa partiyaların mövqeyini də başa düşmək lazımdır. Ancaq biz boykotun tərəfdarı deyilik", - deyə çərşənbə günü Trend -a partiyanın sədri, millət vəkili İlyas İsmayılov bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları isə seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
İsmayılov bildirib ki, bir neçə gün öncə partiyanın Siyasi Şurasında seçkidə hansı formada iştirakla bağlı müzakirələr təşkil edilməsi nəzərdə tutulubmuş. "Ancaq Siyasi Şura tam tərkibdə toplaşa bilmədi. Yoldaşlarımızın bəzilərinin şəxsi işləri var idi", - deyən İsmayılov yaxın günlərdə Siyasi Şuranın yenidən çağırılacağını və seçki ilə bağlı müzakirələrin təşkil ediləcəyini bildirib. İsmayılov partiya daxilində seçki ilə bağlı müxtəlif fikirlərin olduğunu deyib. Ədalət Partiyasının hakimiyyətin namizədini müdafiə etməsinin nə dərəcədə mümkün olmasına gəldikdə isə, İsmayılov partiya daxilində belə təkliflərin olduğunu istisna etməyib. "İnsanların müxtəlif fikirlərinə hörmətlə yanaşmaq lazımdır. Hələlik partiyada müzakirələr başa çatmadan fikir söyləyə bilmərəm. Gərək mövqeyimizi müəyyən edək, sonra konkret fikir bildirək. Ancaq seçkinin xüsusiyyəti odur ki, proses gizli səsvermə yolu ilə olur. Kimin ürəyi kimə istəyir, gedib ona səs verir. Bəziləri bəyan edirlər ki, biz filan namizədi dəstəkləyirik, sonra isə gedib başqalarına səs verirlər", - deyə o əlavə edib. İsmayılov onu da vurğulayıb ki, indiki Seçki Məcəlləsi ilə demokratik seçki keçirmək olar: "Mənim fikrimcə, əsas, demokratik seçki keçirmək istəyi olmalıdır. İstək varsa, bu qanunla da seçki keçirmək olar. İstək olmadıqda, nə cür demokratik qanun qəbul etsən belə, demokratik seçki keçirmək mümkün deyil. Hesab edirəm ki, əsas, istəkdir".
Müxalifətçi Ədalət Partiyası 1993-cü ildə yaradılıb, 1996-cu ildə ADP-yə birləşib. 2000-ci ildə "Ədalət"çilər ADP-dən ayrılaraq partiyanın fəaliyyətini bərpa ediblər. 2001-ci ildən indiyək Ədalət Partiyasına İsmayılov sədrlik edir. İsmayılov 2003-cü ildə Azərbaycanda keçirilmiş prezident seçkilərində prezidentliyə namizəd olub və hazırda Milli Məclisin deputatıdır
Məqalə müəllifi ilə əlaqə ünvanı: [email protected]
