Azərbaycan, Bakı, 27 iyun/ Trend , müxbir E.Babayev / Azərbaycanın müxalif Ümid Partiyası öz ətrafında seçki bloku yaratmayacaq. "Müəyyən partiyalardan əməkdaşlıq barədə təkliflər almışıq, amma geniş mənada blok şəklində seçkiyə getmək düşüncəmiz yoxdur", Trend -un məlumatına görə, cümə günü jurnalistlərə partityanın sədri, deputat İqbal Ağazadə bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları isə seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib.
Ağazadə vurğulayıb ki, əsas blok yaratmaq yox, vətəndaşlarla iş aparmaqdır. "Biz hər evə daxil olmaq prinsipinə üstünlük veririk. Bu işimiz uğurla gedir. Bir müddət öncə 200 minə yaxın vərəqə paylamışdıq. İkinci mərhələdə disklərin paylanması nəzərdə tutulur. Bu disklərdə bizim məsələlərə yanaşmamız əksini tapıb. 20 mindən çox ailəyə bu disklər verilib. Belə disklərin sayını 100 minə çatdıracağıq", - deyən Ağazadənin sözlərinə görə, əgər müəyyən səbəblərdən seçici siyasilərin yanında deyilsə, siyasilər onun ayağına getməli, onu məlumatlandırmalıdır. "Mən pessimist deyiləm və əhalidəki inamsızlığı aradan qaldıracağıq", - deyə Ağazadə qeyd edib. O vurğulayıb ki, Ümid Partiyası seçkidə kütləvi aksiyalar keçirməyi prioritet kimi götürməyib və bu taktikanı tətbiq etmək uğurlu ola bilməz.
Millət vəkili onu da bildirib ki, Seçki Məcəlləsinə əlavə və dəyişikliklər müxalifətin seçki taktikasına təsir etməməlidir.
Müxalifəti təmsil edən Ümid Pariyası 1993-cü ildə yaradılıb. 2002-ci ildə Vətəndaş Birliyi Partiyası (VBP) Ümid Partiyasına birləşib. VBP-nin sədri olmuş Ağazadə Ümid Partiyasına sədr seçilib. Ağazadə Milli Məclisin deputatıdır.
Məqalə müəllifi ilə əlaqə ünvanı: [email protected]