Azərbaycan, Bakı,28 iyul / Trend , müxbir K.Zərbalıyeva/ İranın xüsusi xidmət orqanları ilə iş birliyində ittiham olunan "Tolışi Sədo" ("Talışın Səsi") qəzetinin baş redaktorunun oğlu narkotika cinayətində ittiham olunur.
10 il müddətinə azadlıqdan məhrumetmə cəzasına məhkum edilmiş baş redaktor Novruzəli Məmmədovun Hüquqlarını Müdafiə Komitəsinin bazar ertəsi yaydığı məlumata görə, Emil Məmmədov iyulun 16-da axşam saat 23.00 radələrində oğurlanaraq naməlum istiqamətə aparılıb.
Səbail RPİ-nin istintaq şöbəsindən isə bazar ertəsi Trend -a bildirilib ki, Məmmədovun üzərindən müəyyən olunmuş miqdardan artıq narkotik vasitə aşkarlanıb və bu barədə ailəsi artıq məlumatlandırılıb.
Ona qarşı Cinayət Məcəlləsinin qanunsuz olaraq narkotik vasitələri, psixatrop maddələri və ya prekursorları hazırlama, istehsal etmə, saxlama, daşıma, göndərmə və ya satma (234.1) maddəsi ilə cinayət işi açılıb.
Barəsində isə Səbail rayon məhkəməsinin qərarı ilə 3 ay müddətinə həbs qətimkan tədbiri seçilib.
Məmmədov Bayıldakı 1 saylı İstintaq Təcridxanasına göndərilib.
Müdafiə Komitəsinin sədri Hilal Məmmədov bildirib ki, Məmmədov körpəlik illərindən ruhi-əsəb xəstəliklərindən əziyyət çəkdiyindən orta məktəbin son bir neçə ilini ev şəraitində təhsil alib, Bakı Baş Səhiyyə İdarəsinin ruhi-əsəb xəstəlikləri dispanserində rəsmi qeydiyyata alınıb.
İstintaq şöbəsinin rəisi Elşad Əbdülrəhimov Məmmədovun ruhi xəstə olması barədə onlarda sənəd olmadığını, bu haqda sənəd olduğu təqdirdə onun psixoloji ekspertizadan keçiriləcəyi barədə qərar qəbul ediləcəyini deyib.
Rəis Məmmədovun həbsinin onun atası ilə əlaqəli olması barədə Müdafiə Komitəsinin yaydığı məlumatı əsassız hesab edir.
O bildirib ki, Məmmədov fakta görə saxlanılıb və barəsində istintaq hərəkətləri aparılır.
Müəlliflə əlaqə saxlamaq üçün elektron ünvan - [email protected]
