Azərbaycan, Bakı, 08 avqust / Tr , müxbir E.Babayev/ Hakim Yeni Azərbaycan Partiyası (YAP) prezidentliyə namizədinin qeydə alınması üçün zəruri olan imzaların toplanılmasına başlayır. "Bilirsiniz ki, artıq Mərkəzi Seçki Komissiyasının (MSK) avqustun 7-də keçirilən iclasında YAP-ın prezidentliyə namizədi, indiki dövlət başçısı İlham Əliyevin namizədliyi təsdiq olunub. Bundan sonra isə imzatoplama kampaniyası başlayır və bununla bağlı YAP-ın 1000 nəfərə yaxın fəalı müəyyənləşib ki, imzalar toplansın və onlara bu proseslə əlaqədar treninqlər keçirilib", cümə günü Trend -a YAP icra katibinin müavini, millət vəkili Siyavuş Novruzov bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. İndiyə qədər qarşıdan gələn prezident seçkilərində iştirak etmək üçün Mərkəzi Seçki Komissiyasına (MSK) 11 nəfər müraciət edib. Siyasi təşkilatlardan hakim Yeni Azərbaycan Partiyasının namizədi İlham Əliyevin, Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Liberal-Demokrat Partiyasının sədri Fuad Əliyevin, Yaşıllar Partiyasının sədri Mais Güləliyevin sənədləri MSK-ya təqdim edilib. Bundan başqa, Yaşar Əhmədovun (işsiz), Əlimuxtar Əkbərovun (təqaüdçü), Sevinc Quliyevanın (Sumqayıt Mərkəzi Klinik Xəstəxanasında sanitar), Vüqar Seyidovun (həkim), Qüdrət İsaqovun (AMEA-nın Fizika İnstitutunun aparıcı elmi işçisi) sənədləri MSK-ya təqdim edilib.
Artıq onlardan 6 namizədin - İlham Əliyevin, İqbal Ağazadənin, Yaşar Əhmədovun, Vüqar Seyidovun, Əlimuxtar Əkbərovun və Sevinc Quliyevanın namizədliyi MSK tərəfindən təsdiqlənib. Namizədlər 10 gün müddətində 40 min seçici imzası toplayaraq MSK-ya təqdim etməlidirlər.
Novruzov həmçinin bildirib ki, YAP seçki zamanı yeni texnologiyalar tətbiq edəcək. "Nəzərinizə çatdırım ki, nümayəndələrimizin böyük hissəsini ayrı-ayrı ölkələrin təcrübəsini öyrənmək üçün treninqlərə göndərmişik. Onlar Polşa, ABŞ, Macarıstan, Türkiyə və başqa ölkələrdə seçki texnologiyalarını öyrənirlər. O cümlədən, ABŞ-ın Beynəlxalq Respublikaçılar İnstitutu, Milli Demokratiya İnstitutu tərəfindən YAP fəallarına treninqlər keçirilib. Bir sözlə, seçkilərlə bağlı hərtərəfli hazırlıq işlərini görmüşük. Yəni, bu cür kadr potensialının hazırlanması və seçkilərdə bu potensialdan istifadə olunması istiqamətində addımlar atılıb", - deyə o bildirib.
Ümid Partiyasının sədr müavini Rəfael Tağızadə isə cümə günü Trend -a bildirib ki, partiya imzatoplama kampaniyasına ciddi şəkildə hazırlaşıb. "Partiyanın regional və mərkəzi seçki qərargahlarında bunun üçün xüsusi insanlar ayrılıb. Dəqiq sayı demək bir qədər çətin olsa da, onu birmənalı şəkildə deyə bilərəm ki, biz bu kampaniyanı başa vura biləcəyik", - deyə o bildirib.
Müxalifəti təmsil edən Ümid Pariyası 1993-cü ildə yaradılıb. 2002-ci ildə Vətəndaş Birliyi Partiyası (VBP) Ümid Pariyasına birləşib. VBP-nin sədri olmuş İqbal Ağazadə Ümid Partiyasına sədr seçilib. Ağazadə Milli Məclisin deputatıdır.
YAP isə 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]
