Azərbaycan, Bakı, 21 avqust / Trend , müxbir R.Novruzov/ "Azərbaycan vətəndaşlarının sərbəst toplaşmaq azadlığı haqqında" Qanuna dəyişikliklər tamamilə müsbətdir, Venesiya komissiyası katibliyinin nümayəndəsi Sergey Kuznetsov cümə axşamı Trend -a bildirib.
"Azərbaycan vətəndaşlarının sərbəst toplaşmaq azadlığı haqqında" Qanuna dəyişiklik və əlavələr haqqında" Qanun layihəsi Azərbaycan Milli Məclisinin yay sessiyasında qəbul edilib. Düzəlişlər Avropa Şurası Venesiya komissiyası ilə razılaşdırılıb.
"Sərbəst toplaşmaq azadlığı haqqında" Qanun müsbət dəyişikliklərə məruz qalıb və biz bunu müşahidə etmişik", - Kuznetsov bildirib.
Onun sözlərinə görə, Qanunda nöqsanlar olsa belə, yığıncağın uğurlu alınması onun iştirakçılarının iradəsindən asılıdır. "Yığıncaq iştirakçıları onun uğurlu keçməsini istəsələr, bunun üçün əllərindən gələn səyləri göstərəcəklər", - o bildirib.
"Sərbəst toplaşmaq azadlığı haqqında" Qanunla bağlı ölkənin siyasi qüvvələri arasında yeganə fikir ayrılığı şəhərlərdə mitinqlərin keçirilməsi üçün yerlərin ayrılması məsələsi ilə əlaqədardır, Azərbaycan Prezidenti İcra Aparatının İctimai-siyasi şöbə müdiri Əli Həsənov bir müddət əvvəl bildirib.
"Bu, yalnız şəhərin və ya digər yaşayış məntəqələrinin infrastruktur və kommunikasiya imkanlarından asılıdır", - Həsənov qeyd edib və əlavə edib ki, ölkənin siyasi qüvvələri arasında qanuna digər dəyişiklik və əlavələr üzrə hansısa ciddi fikir ayrılıqları yoxdur.
Müəlliflə əlaqə saxlamaq üçün elektron ünvan [email protected]