Azərbaycan, Bakı, 09 sentyabr / Trend , müxbir İ.Əlizadə/ Azərbaycan müxalifətini təmsil edən Klassik Xalq Cəbhəsi Partiyası (KXCP) prezident seçkisində iştrak etməyən partiyaların birgə bəyanatına qoşulmamaqla bağlı mövqeyini dəyişməyəcək.
"Biz həmin bəyanata qoşulmamaqla düzgün qərar vermişik, burada heç bir səhv yoxdur və onu imzalamayacağıq da", çərşənbə axşamı Trend -a KXCP sədri Mirmahmud Mirəlioğlu bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Bir qrup müxalifət partiyası seçkini boykot edir. Seçkini boykot edən Milli Birlik Hərəkatının lideri Lalə Şövkət, "Azərbaycan Naminə" İctimai Forumun prezidenti Eldar Namazov, Azərbaycan Xalq Cəbhəsi Partiyasının sədri Əli Kərimli, Müsavat Partiyasının başqanı İsa Qəmbər, Vətəndaş və İnkişaf Partiyasının sədri Əli Əliyev sentyabrın 5-də prezident seçkisi ilə bağlı birgə bəyanat imzalayıblar.
KXCP sənədin hazırlanması ilə bağlı məsləhətləşmələrdə iştirak etsə də, birgə bəyanatı imzalamayıb.
Məsləhətləşmələrdə iştirak edən partiya Ali Məclisinin sədri Zəlimxan Məmmədli bildirib ki, KXCP-nin müxalifətin birgə bəyanatına qoşulmaması səhv qərardır.
"Mən partiyanın birgə bəyanata qoşulmamasının səhv olmasına dair fikirlərin özünü səhv hesab edirəm. Bəyanata qoşulanların necə müxalifətçi olduqları hamıya məlumdur. Mən hələ onlar haqqında yumşaq danışıram. Zəlimxan Məmmədlinin nə deməsi isə onun özünün şəxsi fikridir", - deyə partiya sədri əlavə edib.
Mirəlioğlu qeyd edib ki, partiya müxalifətin birgə bəyanatına qoşulmaq məsələsini müzakirə etməyəcək.
"Hansı partiya birgə bəyanata qoşulmaqla bağlı qərar qəbul edib? Partiyanın heç bir strukturu birgə bəyanata qoşulmaqla bağlı qərar qəbul edə bilməz", - KXCR sədri əlavə edib.
O deyib ki, KXCP rəhbərliyində birgə bəyanata qoşulmaq məsələsi müzakirə olunmayıb. Mirəlioğldu Ali Məclis sədrinə məsləhətləşmələrdə iştirak etmək səlahiyyəti verdiyini bildirib.
Məqalə müəllifi ilə əlaqə ünvanı: [email protected]
