Azərbaycan, Bakı, 10 noyabr / Trend , müxbir A.Hüseynbala/ Azərbaycan müxalifətinin yeni yaranacaq mərkəzinin "Azadlıq" adlandırılmasını mümkün hesab edirəm.
"Amma bundan əvvəl müxalifətin daha geniş tərkibdə əməkdaşlığı üçün xüsusi fəaliyyət proqramının hazırlanması daha vacibdir", - bazar ertəsi Trend -a Müxalifətin Əməkdaşlıq Mərkəzinə daxil olan "Azərbaycan Naminə" İctimai Forumun rəhbəri Eldar Namazov bildirib.
Trend - un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyalari), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrin əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasının yaranması baş tutmur. Müxalifətin Əməkdaşlıq Mərkəzinə daxil olan Liberal və Xalq Cəbhəsi partiyalarının liderləri siyasi hərəkatların yeni yaranacaq təşkilatının "Azadlıq" adlandırılmasını təklif ediblər.
Namazov deyib ki, onun üçün yeni əməkdaşlıq mərkəzinin hansı ad altında fəaliyyət göstərəcəyi prinsipial məsələ deyil.
"Müxalifətin geniş tərkibli bloku yaranacaqsa, təbii ki, "Azadlıq" bloku buraxılmalıdır. Bu zaman yeni yaranan əməkdaşlıq mərkəzini "Azadlıq" adlandırmaq olar", - müxalif hərəkatın rəhbəri vurğulayıb.
ANİF rəhbərinin sözlərinə görə, "Azadlıq" blokuna daxil olan siyasi hərəkatlar və Müsavat Partiyası hansı adı seçsələr, onunla razılaşacaq.
"Müsavatın "Azadlıq" blokuna qayıtması mövzusunun davam etdirilməsi gələcək müttəfiqlik münasibətlərinə xələl gətirir", - bazar ertəsi Trend -a Müsavat Partiyası Mərkəzi İcra Aparatının rəhbəri Arif Hacılı bildirib.
Hacılı "Azadlıq" blokunda təmsil olunan siyasi hərəkatların rəhbərlərinə bir daha belə təklif səsləndirməməyi tövsiyə edib.
"Müsavatın "Azadlıq" blokuna qayıtmasını yenidən gündəmə gətirmək qeyri-konstruktiv mövqedir", - Hacılı deyib.
Məqalə müəllifi ilə əlaqə ünvanı: [email protected]
